Tíminn flýgur ... og margt hefur gerst síðan síðast !! Enda allt of langt síðan að ég hef gefið mér tíma í að skrifa nokkrar línur um lífið hér í Kóngsins Köben.

Hvar á ég að byrja ?? ...

Við fjölskyldan fluttum í byrjun september 2010 ... það reyndist MJÖG erfitt að finna nýja íbúð og eftir margra vikna leit skrifuðum við undir eins árs leigu samning. Nú búum við í Köben NV (nord-vest), einum km frá Nørrebrostation og líkar það alveg ágætlega. Hverfið er ansi ólíkt gamla hverfinu í Rødovre, sem var rólegt og svolítið sveitalegt danskt úthverfi. Í nord-vest er hins vegar fjölþjóðlegur hrærigrautur með kebab-búllum og undarlegum matvörubúðum á hverju götuhorni. Blokkin sem við búum í er nýleg og íbúðin er björt og fín ... þetta er stærsta íbúðin sem við Stefán höfum búið saman í en hér höfum við sér eldhús, auka herbergi fyrir skonsuna, stórar svalir og geymslu !! Ekki slæmt.

Ingibjörg Þóra fékk pláss á leikskólanum Ørnen 11. október en fram að þeim tíma þurftum við að skutlast með skonsuna fram og til baka til dagmömmunnar í Rødovre !! Ég viðurkenni það alveg að við vorum bæði komin í nokkuð gott form eftir alla þessa hjólatúra en í lok dags hafði ég enga orku til að læra og var því ótrúlega feginn þegar hún fékk loksins pláss á leikskólanum ... sem er by the way við hliðiná blokkinni okkar. Við Stefán vorum bæði svolítið kvíðinn fyrir því að láta hana á leikskóla þar sem henni hafði ekki liðið alltof vel hjá dagmömmunni og þá sérstaklega þá daga sem dagmamman var með auka börn ... en þá var Ingibjörg Þóra alltaf eitthvað svo ósátt og vælinn hjá henni. Sem betur fer gekk ótrúlega vel að aðlaga dömuna að leikskólalífinu og við Stefán finnum að hún er ánægð og líður vel þar.

Fyrir framan leikskóladeildina sína núna í ágúst með Agli Vali og Bylgju :)

Ég kláraði stóra prófið á annarri önn korter í jólin og nokkrum dögum seinna komu amma, afi og Egill Valur til Kaupmannahafnar og voru hjá okkur yfir jólahátíðina. Fyrstu jólin okkar hér í Köben voru því extra dásamleg ... frábær endir á viðburðarríku ári. Nýja árið byrjaði því miður ekki jafn vel en við fjölskyldan lágum með viðbjóðslega magapest allan janúar !! Ingibjörg Þóra greyið tapaði fallegu bumbunni sinni og mamman missti nokkur dýrmæt kíló. Ég kláraði síðan fyrsta árið í læknisfræðinni í lok janúar og við mæðgurnar skelltum okkur eftir það í tveggja vikna fitunarbúðir til Íslands. Við áttum yndislegar tvær vikur ... og mamman át ís með súkkulaði/karamellu sósu og ávöxtum á hverju einasta kvöldi !!

Þriðja önnin mín við Kaupmannahafnarháskóla byrjaði með látum í febrúar ... úúúfffff þetta var svakaleg önn ... ég hef aldrei lært jafn mikið og á sama tíma aldrei fundist ég jafn óundirbúin fyrir próf !! Sem betur fer gekk þetta helvíti upp og ég komst í langt og gott sumarfrí í byrjun júní :)

Ingibjörg Þóra hefur þroskast heil mikið nú á stuttum tíma en hún er LOKSINS farin að tala !! Hún sagði alls fimm orð þegar við fluttum hingað út, þá 14 mánaða gömul ... en svo ákvað hún bara að þegja. Hún myndaði alltaf svo sem voðalega fjölbreytt hljóð en vildi ekki mikið vera að segja meira en mamma, amma og svo seinna bættust við pabbi og afi. Í langan tíma sagði hún bara amma allan daginn en steinhætti því skyndilega einn daginn og kallaði ömmur sínar lengi vel bara mömmu. Mamma kom til okkar í stutta heimsókn síðasliðið haust og upp úr því fór skonsan að tjá sig meira enda er mamma svo dugleg að lesa fyrir hana. Eftir það fór Ingibjörg Þóra að segja endingar á mörgum orðum ... vettlingar voru t.d. gaaaa ... en það eru því miður ansi mörg orð sem enda eins og því var oft erfitt að skilja hvað skonsan vildi. Núna um jólin fékk hún í fyrsta sinn heitt súkkulaði með rjóma og á sama tíma sagði hún fyrstu tveggja orða setninguna ... "kakó með" ... vantaði bara rjóma. 

Eftir heimsóknina okkar til Ísland síðasta janúar má segja að Ingibjörg Þóra hafi byrjað að tala því um leið og við komum aftur til Köben byrjaði hún bókstaflega að æla nýjum orðum !! Einn daginn þegar við löbbuðum heim úr leikskólanum benti hún á poll og sagði hátt og skýrt pollur !! ... og þannig komu mörg ný orð á hverjum degi. Fljótlega fór hún að mynda þriggja orða setningar, sú fyrsta var "afmæli í dag" og í mars sagði hún hátt og skýrt við matarborðið "mig har mere skinka !! Síðasta vor var skonsan því ekki aðeins farin að tala íslensku heldur kom danskan líka sterkt inn ... hún talaði í raun heilmikla dönsku, sagði t.d. "mammas", "tabbis" þegar hún meinti mamma á þetta osfr. Þegar hún svæfði dúkkurnar sínar þá sagði hún "baby sove" og við matarborðið heyrðist "mere, mere, mere".

Skonsan með Skoppu og Skrítlu eftir leiksýningu sl. janúar  :)

Það er mikill léttir að Ingibjörg Þóra sé farin að geta tjáð sig svona vel því hún er svo skapstór og óþolinmóð að þegar við skildum hana ekki á fyrstu 10 sekúndunum þá var allt ónýtt og hún var farin að öskra og gráta ... enda vorum við Stefán alveg að vera gráhærð á barninu í vetur :/

Sumarið hér í Köben hefur verið yndislegt þrátt fyrir endalausa rigningardaga ... en fyrir vikið hef ég gert meira af því að slappa af en ég ætlaði mér :/ Stefán var því miður bara búin að vinna sér inn 3 vikna sumarfríi en við nýttum viku af því til að ferðast um Sjáland á hjólum !! Við skemmtum okkur rosalega vel í ferðinni, ég viðurkenni það alveg að þetta var töff en mikið vorum við ánægð með okkur þegar við komum aftur heim. Héðan í frá ætlum við að reyna að fara í hjólaferð á hverju sumri !!

Á leiðinni heim til Köben eftir frábæra hjólaferð :)

Afi kom til Kaupmannahafnar daginn eftir að við komum til baka úr ferðalaginu okkar og nokkrum dögum seinna fóru stungu þeir Stefán af til Berlínar ... hjólandi, hvað annað ;) Mamma kom til Köben sama dag og þeir lögðu af stað en alls voru amma og afi hjá okkur í þrjár yndislegar vikur. Egill Valur og Bylgja heimsóttu okkur síðan í 10 daga núna í Ágúst þannig að það er búið að vera fullt hús í nánast allt sumar !!

Ingibjörg Þóra var alls í fimm vikna sumarfríi frá leiksskólanum og daman er orðin ótrúlega dugleg að tala íslensku eftir þann tíma. Hún er nú farin að segja sjö orða setningar á íslensku ... svo kemur í ljós hvernig þetta þróast nú þegar hún er aftur byrjuð í leikskólanum. Leikskólakennarinn hennar nefndi við mig í gær að hún hefði talað mjög mikla íslensku þann daginn og að hún hafi átt í mestu vandræðum með að skilja stelpuna ... greyið barnið.

Nú er stutt í að skólinn byrji aftur hjá mér :/ Úúúffff ég get ekki sagt að ég sé alveg tilbúin að byrja aftur en maður verður bara að spíta í lófana, seinasta önn var svo erfið að ég er enn með blóðbragð í munninum !! Það er víst sem betur fer versta önnin og nú er hún yfirstaðin :)